…мяжа імперыі заўсёды праходзіла там, дзе слова сутыкалася з паперай…

— Аляксандар Лукашук

Ляўрэатамі «Залатога апострафа-2016» сталі Валеры Гапееў, Міхась Скобла і Крысьціна Бандурына

 


10 лютага ў галерэі TUT.BY падчас адкрыцьця VI фэстывалю памяці Міхася Стральцова адбылося ўганараваньне беларускіх паэтаў і празаікаў прэміяй «Залаты апостраф», заснаванай часопісам «Дзеяслоў».

Пераможцай у намінацыі «Дэбют» стала Крысьціна Бандурына з апавяданьнем «Гарадзкія ланцужкі». У шорт-лісьце гэтай намінацыі разам зь ёй былі Даша Бялькевіч (зь нізкай вершаў «Кветкі і цыгарэткі»), а таксама Марыя Маляўка (з апавяданьнем «Жывая рыба»).

Марыя Маляўка, Крысьціна Бандурына, Даша Бялькевіч

Марыя Маляўка, Крысьціна Бандурына, Даша Бялькевіч

У намінацыі «Паэзія» перамог Міхась Скобла зь нізкай вершаў «Кансэрвацыя агню». Яго бліжэйшымі супернікамі ў барацьбе за ўзнагароду сталі Аксана Данільчык (нізка вершаў «Час зьнешняй адсутнасьці») і Алег Мінкін (паэма «Як дагарае сьвечка…»).

Міхась Скобла

Міхась Скобла

Валеры Гапееў за раман «Ноч цмока» стаў пераможцам у намінацыі «Проза». У шорт-лісьце былі таксама Зараслава Камінская і Вінцэсь Мудроў з апавяданьнямі «Гульня словаў» і «Марсіяне над вёскай» адпаведна.

Валеры Гапееў

Валеры Гапееў

«Залаты апостраф» сёлета ўручаўся 14-ы раз. Ляўрэатамі «Залатога апострафа» ў розныя гады былі і аўтары Свабоды: паэтка Валянціна Аксак (2008 год), празаік Вінцэсь Мудроў, «дэбютант» Франак Вячорка (2010 год), празаік Сяргей Дубавец (2014 год).

Урачыстую цырымонію правеў старшыня Саюзу беларускіх пісьменьнікаў Барыс Пятровіч, які адзначыў, што прэмія «Залаты апостраф» паўстала 14 гадоў таму, калі ў Беларусі зьнікла большасьць літаратурных прэмій:

«Мы заснавалі „Залаты апостраф“, каб падтрымаць беларускіх літаратараў. А назваць прэмію вырашылі так, каб падкрэсьліць асаблівасьць беларускай мовы, у якой, у адрозьненьне ад нашых суседзяў, ёсьць апостраф».

Барыс Пятровіч

Барыс Пятровіч