Архіў нумароў:

Наста Кудасава

_____________________ Божа, пашлі мне Верасень! Вершы	* * * Расставаньне – раздваеньне. Адрываюся, зьнікаю, Сыплю іскры поўнай жменяй: Дагараю. Пачарнелая каплічка Бы зьнямелая нязгода… Адсьпявала сваё Зьнічка Назаўсёды. Вадаспадам льюцца рэкі Сьлёз маіх – дурная звычка! Я ад сёньня і давеку – Проста зьнічка… Расставаньне – раздваеньне… Адрываюся, зьнікаю І – ужо па азначэньні – Дагараю… * * * У бязьвер’і – як у труне! Не ўздыхнуць, не падняцца, не выйсьці ў сьвет. Шлях адзін – сьвятло. Сэрцу – Слова, руцэ – крыло… Хай пачуцьцяў ліецца вольніца, Размываючы ўсе сьляды. Ад каханьняў і ад бяссоньніцаў Адрываюся Назаўжды. Спатканьне з вясной 1. Восені! Толькі восені! Госпадзе, досыць! Досыць мне Біцца самотным ветразем… Божа, пашлі мне Верасень! Сэрца замоўкне – буйнае. Песьня сарвецца – чуйная. Зьнікне чаканьне – сьмешнае. Сьціхне жаданьне – грэшнае. Быццам жыцьцё – халодная, Быццам любоў – нямодная Восень! Сьвятая, родная, Самая неаб-ХОДная… Самая непазь-БЕЖная… Дзе ж яна, Божа? Дзе ж яна?.. 2. Вясна ружовая Мяне ўкрыжоўвае! Самотнай птушкаю крывавай стужкаю душа трапечацца ў палоне Вечнага… Вясна – бяссоньніца! Вясна – прыгоньніца! Вясна – манюка! Рукі выкручвае, сэрца атручвае. Вясна балючая… Ідзі, насьмешніца! Ідзі, я – грэшніца! За мной – ні-чога: ні Бога, ні Лога-са. Сама магу. (Магла б – магутная! Калі б ня ты, Вясна атрутная!) Ну, што спыняешся? Ідзі! Я каюся… Кахала? Бясконца… Чакала? Як сонца… Час мар-навала – марыла. Замарылася. Замарылася. Вясна, зьлітуйся! * * * Дотык вуснаў і… Зьнікні! Толькі сьплю, Толькі сьплю… Разам з ранкам стазыкім Я свой боль наталю. Нахілюся лісьліва Перад лёсам сваім. Можа, стану шчасьлівай? Толькі дым… Толькі дым… За ўсе скарбы і грошы Я цябе не куплю… Дотык вуснаў – навошта… Толькі сьплю, Толькі сьплю?.. * * * Калі сэрца астыне ў апошняй мальбе, Калі крыкне натоўп майму кату “Убей!”, Калі чырвань затопіць бязьвінную бель, – Я, схіліўшыся, небам прыйду да Цябе, Вечнакрылым буслом прылячу да Цябе, Залатымі дажджамі абмыю Цябе, Назаўсёды мая Беларусь.