Дзеяслоў №17

Зьмест (#17)

_____________________ Паэзія	Алесь Разанаў Версэты. Зянон Вялікае Княства. Паэма Алег Лойка Закаханыя вёслы. Паэма Сяргей Чыгрын Крочу ў восень... Вершы Павел Саковіч Куды ляцім? Вершы
_____________________ Проза	Сяргей Рублеўскі Спавядальныя дні ў чужым горадзе. Аповесьць Вінцэсь Мудроў Тузік і Кузік. Аповед Лідзія Арабей Пошукі ісьціны. Абразкі Мікола Дубоўскі У кожнага свая вайна. Аповесьць. Заканчэньне Віктар Вальтар Роджаныя пад Сатурнам. Працяг раману
_____________________ Дэбют	Павел Барахвостаў Недасяжнае неба. Вершы Раман Кудраўцаў Клёны ў тумане. Абразкі
_____________________ Пераклады	Мікола Зэраў Дарогі паэзіі. Вершы Т. Карагесан Бойл Тоне дом. Навэла
_____________________ Архівы	Васіль Быкаў Пункціры жыцьця. Далітаратурная біяграфія. Працяг

_____________________ Эсэ Крытыка Мастацтва	Ян Чыквін Два шляхі разьвіцьця беларускай паэзіі. Максім Багдановіч і Янка Купала Павел Абрамовіч У пошуках свайго чытача. Пісьменьніцкая крытыка Беларусі ХІХ ст. Віктар Жыбуль Расквітацца з жаночай нядоляй. Новыя факты з біяграфіі Ганны Брэскай Алесь Клышка - Зьніч Погляд з-за муру ў сьвет і ў сэрца. Гутарка Сьвятлана Дзядзінкіна-Гук Крыніца, з якой выцякае слова... Польскі дзёньнік Сяргей Харэўскі Срэбнае сьвятло. Вяртаньне фотамайстра і мастака Сяргея Вішнеўскага
____________________ Кнігапіс ____________________ Анкета "Дзеяслова"	Леанід Галубовіч НеЛеГАЛізаванае. Леанід Дранько-Майсюк Сяргей Дубавец

Сьцісла

Летні нумар «Дзеяслова» прапануе чытачам доўгачаканую сустрэчу з новымі творамі знанага паэта, любімца беларускіх інтэлектуалаў, Алеся Разанава, які нядаўна вярнуўся з працяглай вандроўкі ў Германію і Аўстрыю. Апошняя публікацыя на радзіме была ў яго ці не тры гады таму ў першым нумары «Дзеяслова»... Яшчэ адна, без перабольшаньня, сенсацыя гэтага нумару – паэма палітыка і паэта Зянона «Вялікае Княства». З 1996 году аўтар яе, адзін з лідэраў апазіцыі, знаходзіцца на эміграцыі – у Польшчы і ЗША. У паэтычнай рубрыцы сямнаццатага нумару таксама вершы паэтаў землякоў-слонімцаў Алега Лойкі («Закаханыя вёслы») і Сяргея Чыгрына («Крочу ў восень...»), менчука Паўла Саковіча («Куды ляцім?»).
Разьдзел «Проза» адкрываецца шчымліва-драматычнай аповесьцю сталага аўтара «Дзеяслова» Сяргея Рублеўскага «Спавядальныя дні ў чужым горадзе». Навапалачанін Вінцэсь Мудроў, у якога на Беларусі шмат верных прыхільнікаў, прапануе свой новы аповед «Тузік і Кузік», а адна са старэйшых беларускіх пісьменьніц Лідзія Арабей, якой нядаўна споўнілася восемдзесят гадоў, – жыцьцёвыя, спавядальна-псіхалагічныя абразкі пад назовам «Пошукі ісьціны». У нумары зьмешчаныя таксама, спадзяемся, чаканыя чытачамі працяг раману Віктара Вальтара «Роджаныя пад Сатурнам» і заканчэньне аповесьці Міколы Дубоўскага «У кожнага – свая вайна».
Сярод «дзеяслоўных» дэбютантаў гэтым разам ці не ўпершыню няма дзяўчат. Свае першыя спробы пяра прапануюць хлопцы-школьнікі: пачынаючы паэт Павел Барахвостаў з Менску («Недасяжнае неба») і пачынаючы празаік Раман Кудраўцаў з Ліды («Клёны ў тумане»).
У разьдзеле перакладаў прадстаўлены ангельскі і ўкраінскі творцы. Вершы ўкраінскага паэта Міколы Зэрава, які трагічна загінуў у сумнавядомым 1937 годзе, пераўвасобіў па-беларуску Алег Мінкін («Дарогі паэзіі»), а навэлу Т. Карагесан Бойл – вядомая перакладчыца і сталы аўтар «Дзеяслова» Вольга Каладзкая («Тоне дом»).
Трэці нумар запар «Дзеяслоў» друкуе першы сшытак далітаратурнай біяграфіі Васіля Быкава («Пункціры жыцьця»), а наперадзе чытачоў чакае сшытак другі.
У разьдзеле крытыкі і эсэістыкі артыкулы Яна Чыквіна «Два шляхі разьвіцьця беларускай паэзіі» пра няпростыя стасункі між класікамі беларускай літаратуры Максімам Багдановічам і Янкам Купалам; Паўла Абрамовіча «У пошуках свайго чытача» пра пісьменьніцкую крытыку ў Беларусі ў ХІХ стагоддзі, Віктара Жыбуля «Расквітацца з жаночай нядоляй» – пра новыя факты з біяграфіі паэткі Ганны Брэскай з публікацыяй знойдзеных недрукаваных раней вершаў. Алесь Клышка пабываў у Жыровіцкім манастыры і пагутарыў з паэтам Зьнічом, а цяпер з інакам Мікалаем пра мірское і ня толькі жыцьцё і праблемы («Погляд з-за муру ў сьвет і ў сэрца»), віцебская журналістка Сьвятлана Дзядзінкіна-Гук дзеліцца сваімі ўражаньнямі ад вандроўкі ў Польшчу («Крыніца, з якой выцякае слова...»), мастацтвазнаўца Сяргей Харэўскі знаёміць чытачоў з творчасьцю і асобай фотамайстра і мастака Сяргея Вішнеўскага («Срэбнае сьвятло»).
У рубрыцы «Кнігапіс» Леанід Галубовіч разглядае кніжныя навінкі апошняга часу – кнігі Уладзіміра Някляева, Юры Станкевіча, Вальжыны Морт, Рамана Ярохіна, Уладзіміра Цішурова, Алеся Камоцкага, Марыны Наталіч, І. Цэхановіча, Рычарда Белячыца, Алеся Марціновіча і «Слова пра Яна Скрыгана» («НеЛеГАЛізаванае»).
На пытаньні анкеты «Дзеяслова» адказваюць Леанід Дранько-Майсюк і Сяргей Дубавец.