Архіў нумароў:

Вікторыя Сьвірская

_____________________ Побач з табою... Вершы	Я і ты Я – вялікімі крокамі, Ты – нямымі падскокамі, Быццам пума-гарэза. Ты – мажлівымі казкамі. Я – мантажнымі каскамі. Не аксюмаран, бо антытэза. Я – усё, што сумніўнае. Ты – па тросах імклівая. У абдымкі Марфея зваліліся. Ты – у джунглях ліянай, Я – цнатлівым Баянам за паветра ў горадзе біліся. Я – сын лялечных сутак. Ты – сястра прастытутак. Ведаем: выправіць сьвет клапотна. Ты – у швэдары вязаным. Я – табе абавязаны. Нам ня радасна, не журботна. Ты працягні руку да сонца, Мне так пяшчоты нестае… Адзіны, вечны і бясконцы, Для нас з табой бог Ра пяе! * * * Афарбавалі дасканаласьць брудам тратуарных PR-аў, У тваім сэрцы квітнеюць сланечнікі… На тваіх каленях пухнатая белая котка – Поўсьць на памяці, у руках – чорна-белая фотка. Пальцы рвуць матавую паперу, прасочаную фіксажам. Неба гіперпамеру лье кіпучую сажу. Я ня тут, ты ня тут. Складана, што мы ня разам. Мае вочы сустрэнуцца з позіркам постэра. Мы складаемся з пікселяў, з простых фанемаў – фраза. Ранкам – пах кавы, гудзеньне старога тостэра. Паглядзець бы на цені, пакінутыя ў вітрынах. Збыцца б сну, убачанаму апоўдні. Жоўтым колерам надпісы на дыскавых скрынях. Парасон заслугоўвае права быць модным. У гатэлях пад час падарожжаў начую… Ложкі, лыжкі, пажоўклыя постэры. Ты ня рві фотаздымак, ня бі сподак з пачулі, Каву стаў, увесь посуд, што ёсьць: кубкі, шклянкі, тостэр І Я мару застацца Побач з табою У хмурым настроі, У сонечных мроях. Сон. Парасон. Прабач. Я проста хачу быць побач. Чорнае Чорная скура і чаравікі, Чорныя ружы для пахмурнай Вікі, Чорныя літары, чорныя словы, Чорныя выразы чорнае мовы. Кветкі жывыя, як ненатуральныя, Твары любімыя, бы карнавальныя, Я, бы жабрак на бязьлюднай дарозе, Ты, як бурлак у сьмяротнай зьнямозе. Чорныя дыскі і прывітаньні, Чорнае сонца на чорным сьвітаньні, Чорныя крылы чорнае птушкі, Чорныя сьлёзы, чорныя стужкі… Чорнасюжэтныя п’есы — дэбютныя, Чорнапаглядныя лужыны – мутныя, Здрады і шырмы – чорнатрагічныя, Страты і сьвяты, на жаль, нелагічныя. Чорныя дзіркі і завушніцы, Чорныя ніткі і чорныя сьпіцы, Чорнае «дзякуй» і чорнае «годзе»… Чорнае. Чорнае сёньня у модзе!